Ыам ыйын 9 күнэ-Кыайыы күнэ. Сүүрбэһис үйэ саамай улахан сэриитигэр биһиги дьоммут, Советскай Армия хорсун байыастара  фашистскай Германия халабырдьыттарын самнарбыт, өлөр өлүүнү кыайбыт күннэрэ. Ийэ дойдуларын туһугар хааннарын тохпут буойуттарга, тыылга үлэ ыараханын сөрсүбүт, кыайыыны уһансыбыт дьоммутугар, хос эһэлэрбитигэр, эбэлэрбитигэр сүгүрүйэр, кэриэстиир, дьоллоох көҥүл олоххо олорорбутугар махтанар күммүт.

Кыайыы күнэ куруук кэтэһиилээх, киэн туттуулаах, патриотическай өй-санаа уһуктар өрөгөйдөөх күнэ. Биһиги Р.И.Константинов аатынан Амма орто оскуолатын үөрэнээччилэрэ киэн туттар  ытык киһибитин Аҕа дойду Улуу сэриитин ветеранын,  Чурапчы буойуттарын үйэтитэр элбэх кинигэ авторын Иван Михайлович Павловы уонна бүттүүн бар дьоммутун бу Улуу күнүнэн итиитик-истиҥник эҕэрдэлиибит! 

Нэһилиэкпит 126 хорсун хотойо уот сэриигэ кыттыбытын,103 өстөөхтөрү кытта саа-саадах тутан күөн көрсүбүтүн, 23 киһи үлэ фронугар харыстаммакка үлэлээбитин, 48 буойун дойдуларын туһугар олохторун толук биэрбиттэрин , сорохтор сэрии толоонугар сураҕа суох сүппүттэрин туһунан Иван Михайлович кинигэлэриттэн билэбит. Сыралаах үлэтинэн Кинилэр ааттарын бүгүҥҥү күҥҥэ тиэрдибитигэр махтанабыт. Хас биирдиибит аймаҕа ол ааспыт кэм ыар тыынын билбит эбит диэн дьоммут кэпсээннэриттэн истэбит.Үрдүк ааттарыгар сүгүрүйэбит.

Дьоммут ситиспит эйэлээх олохторун сыаналыыбыт, үөрэҕи-үлэни өрө тутабыт, сиэрдээх дьон буола улаатабыт диэн мэктиэ тылбытын этэбит.

Оскуола лидерэ Алена Ильина, үөрэнээччилэр.