Үөрэнээччилэр икки ардыларыгар улуустааҕы мас тардыһыытын түмүктүүр күрэхтэһиитэ Мындаҕаайыга буола турар. С.Е.Попов аатынан спорт саалатыгар оҕо аймах тоҕуоруһа муһунна. Бу иннинэ күрэс былдьаһыылара Уус -Алдан Кэптэнитигэр, Одьулууҥҥа, Чурапчыга ыытыллыбыттара. Өбүгэбит саҕаттан кэлбит спорт бу көрүҥэ улууспутугар тэнийэн, сайдан иһэр. Мас тардыһыытын сэҥээрэр ыччат элбиир. Оннооҕор кыргыттан мастреслини талан, сылы быһа дьарыктанар буоллулар. Күрэхтэһиигэ сэттэ оскуолаттан 74 кыттааччы кэллэ диэн сырдатта Хадаар тренерэ Л.Н.Николаев. Хамаандалар парадтаан киирдилэр. «Болугур нэһилиэгэ» МТ баһылыга А.Н.Флегонтова  эдэр спортсменнары эҕэрдэлээтэ, салгыы спортивнай күрэхтэргэ үөрэ-көтө күрэхтэһэ туруҥ диэн баҕа санаатын эттэ. Амма орто оскуолатын дириэктэрин үөрэх чааһыгар солбуйааччы Н.И.Прокопьева мас тардыһааччыларга ситиһиини баҕарда. Музыкальнай нүөмэрдэр кэннилэриттэн илин-кэлин түсүһүү  көхтөөхтүк салҕанна.

Түмүккэ бэйэлэрин ыйааһыннарыгар Хадаартан Петя Герасимов, Саша Герасимов, Ньургун Софронов, Одьулуунтан Айастаан Аржаков, Сеня Седалищев, Алеша Неустроев, Мындаҕаайыттан Данила Гермогенов, Алеша Абрамов, Хайахсыттан Роберт Поисеев, Диринтэн Вася Аммосов, Артем Аммосов, Рудольф Никитин, Чурапчыттан Тимур Аммосов, Гоша Сокольников,Чыаппараттан Гоша Слепцов, Егор Львов бастакы миэстэни ыллылар. Үөрэнээччибит Алеша Абрамов итиэннэ Одьулуун хамаандатыттан Алеша Неустроев саастыылаахтарыгар абсолютнай чемпион үрдүк аатын ситистилэр. Бары кыттааччыларга, дьарыктаабыт тренердэрбитигэр  эрчимнээх ЭҔЭРДЭ БУОЛУОХТУН!!!                                     «Арылы”  кэрэспэдьиэннэрэ.